Í dag fyllir Jógvan Davidsen úr Elduvík, sum býr á Eysturoyar Røktar- og Ellisheimi, 100 ár.

Jógvan er føddur 7. februar 1910 í Haldarsvík, sonur Mariu Dahl úr Oyndarfirði og David Davidsen úr Tjørnuvík.

Sum tvey ára gamal kom Jógvan til Elduvíkar til mostur sína Andreu og mann hennara Sofus Haraldsen at verða, tí mamma hansara var sjúk.

Jógvan vaks sostatt upp í Elduvík, og fór til skips sum 14 ára gamal. Seinni fór hann á maskinskúla í Havn. Tá hann var í 20-unum, fór hann í læru á maskinverksmiðjuni Tuxham í Keypmannahavn og gjørdist maskinsmiður.

Jógvan giftist í 1937 við Gerdu Jacobsen úr Thisted, tey búsettust í Keypmannahavn, og fing trý børn: Dianu, Stig og Hjørdis.

Gerda andaðist í 1970, og 1983 flutti Jógvan aftur til Elduvíkar at búgva.

Jógvan flutti í Sambýlið á Skála í 2000, og í 2006 flutti hann á Eysturoyar Røktar- og Ellisheim, har hann býr í dag.

Í sambandi við føðingardagin verður opið hús á Eysturoyar Røktar- og Ellisheimi í dag millum kl. 15 og 17.