Nú er líkt til, at Barack Obama, forseti, kann fáa meirilutan av Kongressini at taka undir við teirri umstríddu nýskipanini á heilsuøkinum.

Ein týðandi embætismaður í Hvítu Húsunum sigur við sjónvarpið CNN, at demokratarnir hava savnað so mikið av atkvøðum í Kongressini, at uppskot forsetans kann fáa ta neyðugu undirtøkuna har.

Ætlanin var, at Obama skuldi fara til Suðurasia at vitja, men úr Washington verður sagt, at forsetin hevur útsett ferðina fyri at leggja alla orku í at fáa Kongressina at samtykkja heilsunýskipanina.

Fíggjarnevndin hjá Umboðsmannatinginum hevur fund um nýskipanaruppskotið í morgin.