Í ár verður fyri fyrstu ferð føroysk básaluttøka á umfatandi stevnuni Boston Seafood Show, sum verður í døgunum 14.-16. mars.

Uttanríkisráðið skrivar á heimasíðuni, at fýra føroyskar fyritøkur luttaka á stevnuni í Boston. Hesar eru Bakkafrost, Luna, Salmex og Primafisk. Fyritøkurnar fara saman við umboði úr Uttanríkisráðnum at varpa ljós á føroysku alivinnuna og sjómatarvinnuna í USA og at nema nýggja vitan um hendan týðandi marknaðin.

Á hvørjum ári skipar amerikanski sjómatarídnaðurin fyri Boston Seafood Show, sum er ein umfatandi stevna fyri allar týðandi veitarar og keyparar á amerikanska marknaðinum fyri sjómat. Hvørt ár luttaka yvir 16.000 handilsfólk frá fleiri enn 90 londum og meira enn 80 útstillarar.

- Amerikanski marknaðurin er sera áhugaverdur hjá føroyskum fyritøkum. Í 2009 fekk føroyska alivinnan í meðal 2 krónur meira fyri kilo av stóra alilaksinum, sum tær útfluttu til USA í mun til kiloprísin í Evropa. Eisini er amerikanskimarknaður størri enn allur evropiski marknaðurin tilsamans, og tí liggja stórir møguleikari í hesum marknaði, sigur Jørgen Niclasen, uttanríkisráðharri.

Í 2010 væntast marknaðarparturin hjá føroysku alivinnuni í USA at røkka 4%, sum er ein tvífaldan av marknaðarpartinum í mun til 2008. Ein orsøk er kreppustøðan í Kili, har laksaútflutningurin minkaði við næstan tveimum triðingum í hesum tíðarskeiðinum. Økti amerikanski eftirspurningurin eftir føroyskum alilaksi er eisini grundaður á broyting í nýtsluni av føroyskum útflutningsvørunum, sum nú í størri mun enn áður, verða nýttar í hágóðskuvørum á sushimatstovum.

Í fjør stóð føroyska alivinnan fyri 40 prosent av okkara samlaða vøruútflutningi, og útlitini fyri alivinnuna eru jalig. Í farnu viku kom fram í norskum fjølmiðlum, at føroyska alifyritøkan Bakkafrost var nógv meiri kappingarfør í fjórða ársfjórðingi 2009 enn allar tær stóru marknaðarleiðandi norsku alifyritøkurnar.

- Vit eiga at brúka sterku støðuna hjá føroysku alivinnuni offensivt. Og nú tá Kili, sum størsti veitarin til amerikanska marknaðin er í trupulleikum, hava vit ein góðan møguleika at styrkja um okkara marknaðarstøðu , sigur Jørgen Niclasen, uttanríkisráðharri