Bakkafrost: Sølan hækkaði 8 prosent - tøkugjaldið 295 prosent

Hóast søluprísurin so at siga er óbroyttur, og sølan er lítið hækkað í mun til fyrsta ársfjórðing í fjør, so nærum trífaldaðist tøkugjaldið (295 prosent), sigur Bakkafrost, sum nú hevur almannakunngjørt roknskapin fyri fyrsta ársfjórðing.

Rakstrarúrslitið fyri alt Bakkafrost samtakið var 710 milliónir krónur, og úrslitið eftir skatt var 401 milliónir krónur. Tøkugjaldið var 112 milliónir krónur í fyrsta ársfjórðingi í ár, samanborið við 38 milliónir sama tíðarskeið í fjør og 153 milliónir krónur fyri alt 2023. Partafelagsskattur og tøkugjald tilsamans vóru 193 milliónir krónur í hesum ársfjórðinginum.

Tøkan í Føroyum var 14.294 tons og 7.263 tons í Skotlandi, í mun til ávikavist 11.005 tons og 8.093 tons sama tíðarskeið í fjør. Lívfrøðiliga gongdin var góð í Føroyum, við metlágum lúsatølum, og lívfrøðin batnaði eisini munandi í Skotlandi, har virksemið sum heild gav eitt rakstrarúrslit á 39 milliónir krónur, skrivar Bakkafrost.

– Hetta er fyrsti ársfjórðingur, har vit veruliga síggja, hvussu ógvusligt tøkugjaldið sveiggjar, tá ið NASDAQ prísurin á laksi broytist. Í heyst søgdu vit 140 fólkum úr starvi fyri at niðurlaga víðarivirkingina (VAP-framleiðsluna), tí nýggja tøkugjaldið hækkar váðan í liðugvøruframleiðsluni munandi. Hóast bert 9 prosent (fyrr 40 prosent) av tøkuni nú fer til víðarivirking, hevur liðugvøruframleiðslan í Føroyum í hesum ársfjórðinginum givið tap, sigur Regin Jacobsen, stjóri.

– Sum útlitini eru – eisini við nýggja uppskotinum til broyting av tøkugjaldinum – eru fortreytirnar fyri at víðka liðugvøruframleiðsluna aftur sera vánaligar. NASDAQ prísurin, ið er ein fiktivur prísur og lítið og einki hevur við okkara sáttmálaprísir at gera, hevur ongantíð sveiggjað so nógv sum seinastu árini.