Dráttur og Mjølnir sigraðu bæði eftir gullsett

Tað gjørdist ein langur og ógvuliga spennandi dagur á Hálsi í gjár, tá seinnu FM-finalurnar í Føroya Tele-deildunum vórðu spældar.

Í báðum førum varð neyðugt við fimm settum og síðani sonevndum gullsettum,. Hetta tí at liðið, sum tapti fyrru FM-finaluna, vann sjálvan dystin.

Í sætta og gylta settinum hjá kvinnum gjørdist Dráttur fyrsta liðið, sum ikki hevur vunnið fyrsta finaludystin, ið gerst føroyameistari. Hetta var eisini fyrsta greipan í 40-ára longu søguni hjá vágafelagnum.

Dráttur og Fleyr hava havt ógvuliga tætt stríð um steypini í ár. Har noyðast tær í havnarfelagnum at ásanna, at man var júst ov stuttur í báðum kappingunum.

Føroya Tele-deildin, kvinnur:
Seinna FM-finalan -  leygardagin 27.04

Dráttur – Fleyr 3-2 (16-25, 25-18, 26-24, 23-25, 15-12)

Gullsett: Dráttur – Fleyr 15-12

Sum vera man stórur fagnaður á teimum hjá Drátti (Mynd: Flogbóltssamband Føroya)

Les meira: Dráttur føroyameistari eftir fimmsettara og gullsett

Hjá monnum var nær við at SÍ vendi øllum á høvdið og fekk steypið við til Sørvágs. 

Mjølnir vann fyrstu finaluna sannførandi (3-0) og var á odda 2-0 í gjár eftir tvey góð sett, men so kom SÍ av álvara í gongd. Tað endaði 3-2, og sinnisligi fyrimunurin lá hjá sørvingum undan gullsettinum.

Annar av sterku póllendingunum hjá Mjølni, Mateusz Pazgan, var eisini farin av vølli við skaða í 2. setti. Tó vísti Mjølnir hví liðið hevur so nógv steyp seinastu árini. Pazgan kom eisini á vøllin aftur, og liðið úr Klaksvík vann 15-9 í avgerandi settinum. Sætta árið á rað at steypið ferð norður við monnunum hjá Mjølni, sum taptu steypafinaluna móti SÍ.

Føroya Tele-deildin, menn:
Seinna FM-finalan - leygardagin 27.04

Mjølnir – SÍ 2-3  (25-19, 25-17, 18-25, 22-25, 17-19)
Gullsett: Mjølnir – SÍ 15-9

Tað helt hart, men norðyingar fingu aftur FM-steypið við sær (Mynd: Flogbóltssamband Føroya)

Les meira: Mjølnir føroyameistari eftir fimmsettara og gullsett

Kelda: Flogbóltssamband Føroya