Funnu knívin, sum varð havdur á lofti

Tað var ein knívur, sum løgreglufólk við hjálp av kavarum funnu á havsins botni á vágni í Klaksvík fyrrapartin í gjár.

Og knívurin hevði samband við harðskapsmálið uttan fyri skeinkistaðið Molly’s sunnunáttina.

Knívurin varð havdur á lofti í sambandi við hetta málið, men sum skilst varð ongin stungin í hendingini.

Løgreglan handtók seinni í gjár eigaran av knívinum. Talan er um ein mann í tríatiárunum, sum seinnapartin verður skuldssettur fyri harðskap og grovan harðskap umframt hóttanir, upplýsir vaktleiðarin hjá løgregluni.