Video: - Vit vilja fáa lív í føroyskan tónleik

Unga Klaksvíksorkestrið, Adrenaline, hevur givið út sítt fimta staklag. Herfyri var lagið “Spillikassin” lagt út á YouTube.

Talan er um fyrsta videolagið, sum er tikið upp í komandi mentanarhúsinum í Klaksvík, sum er í gerð í løtuni. Tað er Eyðbjørn Jacobsen, sum hevur staðið fyri videoupptøkunum.

Adrenaline gav út sítt fyrsta lag í mai 2020. Tað var sangurin “Eg vil koyra skjótari”. Síðan hevur tað gingið slag í slag,

- Vit vilja fáa lív í føroyskan tónleik, tí næstan eingin ger føroyskar rock sangir meira. Vit fara 100% at blíva við at gerða meira sangir, og ætla ikki at stegða við at gerða tað, skrivar Adrenaline í tíðindaskrivi í sambandi við útgávuna.

Teir, ið manna Adrenaline, búgva allir í Klaksvík. Teir eru Jónas Jacobsen, 18 ár, sang og gittara, Tórður Sóleyarson, 17 ár, gittara og kór, Niclas Elttør Høgnesen, 17 ár, bass og Høgni Sørensen, 18 ár, trummur.