Nýggj tónleikahøli til musikkskúlan í Tofta skúla

Fyrrapartin varð avhendingarskjalið uppá nýggju tónleikahølini í Tofta skúla undirskrivað.

Fyri byggifyritøkuna KBH undirskrivaði Helgi Johannesen, stjóri, og fyri Nes kommunu Súni í Hjøllum, borgarstjóri.

Tað er Karl Johannesen, byggifrøðingur, sum vegna KBH hevur havt byggileiðsluna av arbeiðnum, og teknistovan í Gøtu við Henning Olsen og Jens Klæmint Jacobsen hevur havt um hendi projektering og eftirlit vegna Nes kommunu.

Kommunan skrivar, at arbeiðið hevur gingið væl eftir umstøðunum, og eru partarnir sera væl nøgdir við úrslitið.

Tað var í summar, at farið varð undir at umbyggja gamla køkin í 1981-bygninginum til tónleikahøli ætlað musikkskúlanum. Talan er um eina gólvvídd á umleið 110 fermetrar. Gjørd eru fýra venjingarrúm, harav tey trý hava dragihurðar ímillum, so til ber at hava samanspæl í einum størri høli. Eisini er eitt høli við tekøki, har starvsfólk og næmingar kunnu savnast.

Eftir ætlan verða nýggju hølini sýnd fram fyri almenninginum í januar, tá ið Musikkskúlin skipar fyri einum tónleikatiltaki.

– Endamálið hjá Musikkskúlanum er at vekja ans fyri tónlistini. At menna tónlistarligu gávur næminganna og í aðramáta at leggja støði undir einum ríkum tónleikalívi; eitt nú við samanspæli, sangi, fyrireika konsertir og spæla til ymisk almenn endamál, sigur Tóri R Jacobsen er leiðari í Nes Sóknar Musikkskúla.

Myndir av hølunum síggjast her.