Í Klaksvík er ein integratiónsnevnd, sum millum annað skal skapa trivnað og virka fyri, at tilflytarar verða betur integreraðir í samfelagið.
Sum liður í hesum verður skipað fyri ymiskum tiltøkum, og leygardagin verður eitt slíkt tiltak við skoytibreytina á Biskopstorginum.
Tá bjóðar nevndin ókeypis skoyting, umframt heitt kakao og bollar til øll í Klaksvík, um hava hug til hetta.
Skipað varð fyri líknandi tiltakið í desember 2021, og var hetta sera væl eydnað, skrivar klaksvik.fo. Karl Johansen, borgarstjóri og formaður í integratiónsnevndini, vónar eisini, at borgara fara at taka væl ímóti tiltakinum hesaferð.
- Øll eru hjartaliga vælkomin at heilsa uppá integratiónsnevndina, at skoyta ella at fáa sær heitt kakao. Bæði tey, sum altíð hava búð í Klaksvík, og tey, sum eru flutt til kommununa.
Integratiónsnevndini, umframt at vera ráðgevandi til borgarstjóran og umsitingina, hevur eisini eitt ynski um at vera sjónligt í samfelagnum, og tað er hetta eitt gott høvi til, sigur borgarstjórin eisini við klaksvik.fo.
Nevndin virkar undir Klaksvíkar kommunu, og borgarstjórin og fyrrverandi borgarstjórin, Jógvan Skorheim, eru millum limirnar. Hini í integratiónsnevndini eru Marjun Lómaklett, Catherine Steinberg, Heini Z. Dahl, Daria Zellmer og Reni Heimustovu.
Vinarliga broyt tínar kennifíla - og privatlívsstillingar fyri at síggja hetta innihald