Skoytibreytin við Biskupstorg er í løtuni tann einasta av sínum slagi í Føroyum. Hon hevur seinastu fýra vetrarnir verið opin. Hesuferð hevur tað verið møguligt at skoyta síðani 8. desember 2022, og umleið 6.500 fólk hava nýtt hendan møguleikan.
Hetta upplýsir Klaksvíkar kommuna á heimasíðu sínari og skrivar víðari, at talan er um eina lítla øking í mun til undanfarin ár.
- Vitjanartølini vísa, at tað er serliga væl umtókt at skoyta í desember mánað og upp undir jól. Í januar hava tað serliga verið nógvir skúlar, frítíðarskúlar, barnagarðar og onnur, ið hava leigað skoytubreytina fyrrapartar.
Hendan veturin hava eisini verið lutfalsliga nógvir dagar, har neyðugt hevur verið at havt stongt, orsakað av ringum veðurumstøðum.
Beint eftir at breytin var latin upp (Mynd: Sverri Egholm)
Klaksvíkar kommuna lat skoytibreytina miðskeiðis í býnum upp í desember 2019. Heimasíðan klaksvik.fo skrivar, at tað serliga eru nógv vitjandi í vikuskiftinum, og at gestirnir koma úr øllum landinum.
- So samanumtikið má sigast, at undirtøkan fyri skoytubreytuni hevur verið góð.
Samstundis boðar kommuna frá, at skoytibreytin skjótt letur aftur á hesum sinni: Seinasti dagur, ið møguleiki er at skoyta hendan veturin, er sunnudagin 12. februar.
Opið er frá 15 til 20 mánadag - fríggjadag og sunnudag; leygardag er opið 10-20. Til ber at leiga skoytubreytina gerandisdagar frá 8 til 15.
Vinarliga broyt tínar kennifíla - og privatlívsstillingar fyri at síggja hetta innihald