Fótbóltur

Betrideildin hjá monnum fer á rull aftur 2. páskadag

Mánadagin 1. apríl eru fýra dystir í 3. umfari á skránni. Tann seinasti dysturin í umfarinum verður spældur í Sørvági týskvøldið.

Klæmint Andrasson Olsen og NSÍ vitja í Klaksvík, har KÍ tekur ímóti. Odmar Færø er í løtuni ein av skaddu spælarunum hjá føroyameistarunum (Savnsmynd: Sverri Egholm)

2024-03-28 15:14

Agnar Prestá

Vanliga er landskappingarfótbóltur ella steypafótbóltur í Føroyum skírisdag. Men orsakað av at landsliðssteðgur júst hevur verið, so verður eingin fótbóltur í dag.

Fremsta kvinnudeildin fór av bakkastokki í gjár, tá kvinnurnar hjá NSÍ vunnu 7-0 á Skála. Tveir aðrir dystir í 1. umfari eru á skránni leygardagin, og tann dagin er eisini fult umfar í næstbestu mansdeildini, umframt at 2. deild fer av bakkastokki.

2. páskadag rullar so bólturin aftur í Betrideildini hjá monnum. Fýra dystir í 3. umfari eru skránni 1. apríl. Tveir byrja klokkan 15 - í Klaksvík og í Gundadali - og klokkan 17 verður bríkslað í gongd á Skála og í Sarpugerði.

Seinasti dysturin í umfarinum verður spældir í Sørvági týskvøldið, tá EB/Streymur vitjar.

Keldur: Fótbóltssamband Føroya og FaroeSoccer

Vinarliga broyt tínar kennifíla - og privatlívsstillingar fyri at síggja hetta innihald