KÍF vann aðru FM-finaluna á nærum ótrúligan hátt

Onnur FM-finalan í Burn-deildini gjørdist ein sannur gysari, sum endaði við at málverjin hjá KÍF skoraði til 24-23 og javnaði til 1-1 í dystum.

Heimaliðið hevði tamarhald á tí ein góðan part av fyrra hálvleiki, har serliga 20-ára gamli høgri vongurin Bárður Dam og royndi bakkurin Rasmus Søby stóðu fyri málinum. Í verjupartinum vóru Tony Hammer Weyhe, Tóki Fríðriksson, Eyðbjørn Danielsen og hinir vóru eirindaleysur ofta, tá hoyvíkingarnir komu ímóti, og Milenko Jelkan tók nógv frá serliga vongplássunum.

Bárður Dam fer úr spískum (Mynd: Jens Kr. Vang)

Tað var 14-11 í steðginum, men leiðslan hjá heimaliðnum hvarv skjótt í 2. hálvleiki. H71 hevði loyst nøkur ting, skoraði betri - millum annað kom Bogi Hansen í gongd - og KÍF hevði heldur ilt við at halda Ísaki Vedelsbøl; íhvussu er lógliga.

Torstein Sivertsen og hoyvíksmúrurin frammanfyri seg var sterkur, og í løtum var leiðslan hjá H71 uppi á trimum málum.

Tá 80 sekund vóru eftir var 21-23. Men so sást at H71-liðið framvegis er ungt, og at Bogi sat uttanfyri við útvísingum. Fríði Weyhe skoraði við góðum langskoti, H71 blakaði bóltin burtur í álopinum, og so javnanði blaðungi Tóki Fríðriksson trygt av strikuni.

13 sekund eftir, leikbrá til útiliðið, men í álopinum miseydnaðist at spæla inn til Ísak á strikuni. Milenko fekk bóltin í hendurnar, mótstøðumálið var tómt, av tí at H71 hevði útvísing og hevði lopið á við seks monnum. Bólturin rakti jørðina á vegnum, Torstein kom sprintandi inn og øll í larmandi høllin ivóru meira friðarlig og hildu nærum ondini...til eitt brøl kom frá Reyða Múrinum og øllum í reyðum.

Myndir: Jens Kr. Vang

Sí fleiri myndir her

KÍF hevði vent tí á ótrúliga hátt, og hetta merkiskt sjálvandi í høllini. Nú er javnvág í finalurøðini. Neyðugt er at vinna tríggjar dystir fyri at gerast FM-vinnari, so vit skulu hava minst tvær FM-finalur afturat. Finala nummar trý verður spæld í Hoyvík leygarkvøldið 27. apríl klokkan 19.

Onnur FM-finalan í Burn-deildini
Høllin í Kollafirði, mikudagin 24.04
KÍF-H71 24-23 (14-11)

Toppskjútti: Rasmus Søby 8 mál

Nummar 8 skoraði átta mál fyri KÍF (Mynd: Jens Kr. Vang)

Sí dómaraseðil og dystargongd her

Sí eisini: Myndir: KÍF - H71 (onnur FM-finalan)